Այսօր՝ դեկտեմբերի 23-ին, Երևանի ավագանին կանցկացնի իր 5-րդ նստաշրջանի 4-րդ տարեվերջյան նիստը, որի ընթացքում կընդունի 2026 թվականի տեղական վճարների դրույքաչափերը։
Նիստի օրակարգում ներառված են «Երևան համայնքում 2026 թվականի տեղական տուրքերի գծով արտոնություններ սահմանելու մասին» և «Երևան համայնքում 2026 թվականի տեղական վճարների գծով արտոնություններ սահմանելու մասին» զեկույցները։
Այս նիստի հիմնական թեման կլինի քաղաքային տուրքերի և վճարների մասին նախագիծը, որը ներառում է նաև սկանդալային «Կարմիր գծերի» վճարների թանկացման դրույթներ։
«Մայր Հայաստան» խմբակցության անդամ Գևորգ Ստեփանյանը նախապես հայտարարել է, որ ավագանու նիստի ընթացքում կներկայացվի նոր նախագիծ՝ բարձր վճարներով։
Հիշեցնենք, որ 2023 թվականի վերջին ընդունված որոշմամբ Երևանը բաժանվեց երկու գոտի՝ «Ա» և «Բ»։ «Ա» գոտում, որտեղ գտնվում են քաղաքի կենտրոնական մասերը, կայանման մեկ տարվա գինը նախկին 12 000 դրամի փոխարեն սահմանվեց 160 հազար դրամ, իսկ «Բ» գոտում՝ 24 000 դրամ։ Շեշտակի թանկացան նաև 1 ժամվա, շաբաթվա և ամսվա կայանման վճարները։
«Մայր Հայաստան» խմբակցությունը 2024 և 2025 թվականների ավագանու այս որոշումները վիճարկել է Վարչական դատարանում։ Դատարանը երկու գործերով էլ նշված դրույթներն անվավեր է ճանաչել, սակայն դրանք օրինական ուժի մեջ չեն մտել, քանի որ Երևանի ավագանին դրանք բողոքարկել է։
Այսպիսով, եթե այսօր ավագանին կրկին հաստատի նախագիծը, այն կրկին կհայտարարվի անվավեր, սակայն կմնա գործող։ Իսկ եթե նիստում չապահովվի քվորում, ապա նախագիծը կրկին կմնա կյանքի չկոչված։
Ավագանու նիստում «Մայր Հայաստան» խմբակցության ղեկավար Մանուկ Սուքիասյանը նշել է, որ «Քաղաքացիական պայմանք» կուսակցությունը և նրա կցորդները կրկին բերում են թանկացումներ։ Իսկ խմբակցության անդամ Սամվել Հակոբյանը նշել է, որ «կարմիր գծերի» վերաբերյալ նախագիծը կրկին թանկացում է առաջացնում։
