Հայաստանի ֆուտբոլի ֆեդերացիան (ՀՖՖ) պարտվել է դատական գործին, որը ներկայացվել էր նախագահ Արմեն Մելիքբեկյանի կողմից՝ «Փյունիկ» ակումբի նախկին սեփականատեր Արթուր Սողոմոնյանի դեմ։ Վերաքննիչ քաղաքացիական դատարանը նոյեմբերի 20-ին հայտարարել է, որ Սողոմոնյանի հայտարարությունները, որոնք նա արել էր 2022 թվականին ակումբի պաշտոնական կայքում հրապարակված հարցազրույցում, չեն պարունակում զրպարտանք կամ անձի արատավորման դրվագ։
Այս դատական գործը ՀՖՖ-ի դեմ ներկայացված երկրորդ հաջող հայցն է։ Առաջինը Լոզանի արբիտրաժում հաղթել էր «Սեւան» ակումբի նախկին սեփականատեր Տիգրան Հակոբյանը, որտեղ փաստացի ապացուցվեց, որ նրան անհիմն կերպով հեռացրել են հայկական ֆուտբոլից։
Հիշեցնենք, որ Արթուր Սողոմոնյանը տեւական ժամանակ է սուր քննադատության է ենթարկում ՀՖՖ-ի ղեկավարությանը՝ հարցազրույցներում և մամուլի ասուլիսներում։ Նրա քննադատությունը հիմնված է մի շարք պնդումների վրա՝ մարզադաշտերի վարձակալության գների բազմակի աճ, մանկապատանեկան ֆուտբոլի զարգացման ծրագրերի անարդյունավետություն, մարզային ակումբների լքում առաջնությունից, կարգապահական որոշումների թափանցիկության բացակայություն, ԲԿՄԱ-ի միջոցով ֆուտբոլից դուրս ոչ ֆուտբոլային անձանց արտերկիր տեղափոխում և այլն։
Սողոմոնյանը հայտնի գործարար է և բարեգործական նախագծերի հեղինակ, ով, ինչպես նաև այլ խոշոր գործարարներ, ստիպված է եղել լքել հայկական ֆուտբոլը՝ չստանալով իշխանությունների կողմից բարոյական աջակցություն։
Նրա ներկայացուցիչներից մեկը հայտնել է, որ Սողոմոնյանը վաղուց ասել է, որ այս դատական գործի արդյունքում իրեն փոխանցվելիք գումարները կուղղի բարեգործությանը։
