Միացյալ Նահանգների նախագահ Դոնալդ Թրամփի վարչակազմը որոշում է կայացրել հետ կանչել աշխարհի շուրջ 30 երկրում իր առաքելությունները կատարող դեսպաններին և բարձրաստիճան դիվանագետներին։ Այս մասին հայտնում է Associated Press լրատվական գործակալությունը՝ հղում անելով Պետդեպարտամենտի երկու անանուն պաշտոնյաների խոսքերին։
Այս քայլի արդյունքում հետ կանչվելու են նաև այն դեսպանները, ովքեր ծառայում են Հայաստանում, Լաոսում, Ֆիջիում, Կամերունում, Կոտ դ’Իվուարում, Նիգերիայում, Ուգանդայում, Մակեդոնիայում, Մոնտենեգրոյում, Սլովակիայում, Ալժիրում, Եգիպտոսում, Նեպալում, Շրի Լանկայում, Գվատեմալայում և Սուրինամում։
Պետդեպարտամենտի աղբյուրների համաձայն՝ այս դեսպանները, որոնք նշանակվել են ԱՄՆ նախկին նախագահ Ջո Բայդենի կողմից, տեղեկացվել են, որ նրանց պաշտոնավարումը ավարտվելու է 2026 թվականի հունվարին։
ԱՄՆ նախագահի վարչակազմը պաշտոնապես չի մեկնաբանել այս որոշումը, սակայն Պետդեպարտամենտի ներկայացուցիչները նշել են, որ նման փոփոխությունները նորմալ են և կատարվում են ցանկացած վարչակազմի դեպքում։ Նրանք նաև հավելել են, որ դեսպանը «նախագահի անձնական ներկայացուցիչն է», և այդ պատճառով նախագահը իրավունք ունի ունենալու այնպիսի անձանց, որոնք լիարժեքորեն աջակցում են «Ամերիկան՝ առաջինը» քաղաքականությանը։
Հայաստանում ԱՄՆ դեսպան Քրիստինա Քվինը Երևան է ժամանել 2023 թվականի փետրվարի 16-ին՝ դառնալով Հայաստանում Միացյալ Նահանգների 10-րդ դեսպանը։ Նախկինում նա եղել է ԱՄՆ գործերի ժամանակավոր հավատարմատարը Ուկրաինայում (2020-2022թթ.)։
Այս քայլը համարվում է Թրամփի կողմից իր արտաքին քաղաքականությանը համապատասխան դիվանագետների նոր ալիք ներմուծելու և իր ազդեցությունը աշխարհի տարբեր անկյուններում ամրապնդելու մասին հայտարարություն։
